Skip to content

ymgyrchu araf

Bennu Baner

Cwpwl o luniau creu baner newydd East End Women’s Museum – wedi’i chreu yn arbennig ar gyfer gorymdaith goffa Brwydr Cable St yn Llundain. Gallwch ddarllen mwy am hanes cyfraniad menywod at y diwrnod fan hyn: Women at the Battle of Cable Street.

Fe ddefnyddiais i wyddor crosio Moogly ac edafedd cotwm ar gyfer y llythrennau, a’u startsho ar gefndir deniadol yr hen garped yn y gegin fach:

blocio llythrennau crosio

 

Ar ôl eu blocio, eu defnyddio i farcio’r faner yn defnyddio sialc. Mi ddefnyddiais sialc teiliwr fy nain, Nancy Hughes – cefais ei bocs pwytho yn anrheg gan dad a mae’n drysor gwerthfawr iawn.

Dwi ddim yn giamstar ar fesur a thorri, a dwi’n casau smwddio, felly gwneud y darn nesa tra’n sgyrnygu/yfed gwin/distractio fy hun trwy wylio Star Trek wnes i. 

Y llythrennau wedi'u mesur a'u marcio
Y llythrennau wedi’u mesur a’u marcio

 A dyma hi wedi ei gorffen, eto ar gefndir deniadol y gegin gefn, lle mae’r gwaith ar stop tan i ni ennill y loteri/dysgu sut i blastro.   baner east end women's museum Tyfodd yr amgueddfa mas o hedyn gwneud baneri bychain, archwilio hanes baneri syffrajets Cymru, a myfyrio ar y teithiau y gwnaethon nhw i mewn ac allan o’r wlad. Mi anfonais hi mewn tiwb i Lundain ar gyfer yr orymdaith:

Wnes i fethu dod (mae’n ddrud teithio nôl a mlaen felly roedd rhaid aros adre’r tro hwn) ond mi siaradais i efo Refinery 29 am amgueddfeydd ac ymladd ffasgaeth yn y dyddiau cyn y digwyddiad.

 

Mae’n wych sut ma gwaith llaw bychan, diwyd, intimate, yn galluogi menywod i gael sgyrsiau cyhoeddus, mawrion, pwerus. Diolch i bawb ddaeth i siarad efo Sarah yn ystod yr orymdaith.

Diweddariad: Amgueddfa ar Hap

Wel, ma gyno ni wefan rwan, felly ‘dyn ni’n bodoli!

 

http://eastendwomensmuseum.org/ (dwedwch wrth eich ffrindie)

 

Screen Shot 2016-01-22 at 00.33.28

Mae modd i chi ddod yn rhan o’r prosiect, neu ymuno â’n rhestr bost ^^^^.

Ar hyn o bryd, ‘dyn ni’n edrych ymlaen at greu arddangosfa fach efo Eastside Community Heritage, yn ogystal â chefnogi gwaith grwpiau cymunedol yn St George in the East i gynnal arddangosfeydd a digwyddiadau i wrthwynebu amgueddfa Jac y Ripar.

Os ydych chi’n byw neu’n gweithio yn nwyrain Llundain, neu os oes gennych chi hanes teulu yn hannu oddi yno, cysylltwch efo ni!

 

 

Creu Amgueddfa Ar Hap

Wel. Mae’r East End Women’s Museum yn bodoli rwan. Ymateb wnes i a Sarah Jackson i stori’r Amgueddfa Jack The Ripper ar Cable Street yn nwyrain Llundain.

O fewn wythnos, mi oedd dros 600 o bobl wedi ymuno â ni i helpu. Roedd ebyst yn fflio gan yr Independent, y New York Times, a phapurau newydd yn Tsieina – oll isie gwybod mwy am y prosiect.

Mewn gwirionedd, pobl dwyrain Llundain fydd yn rhoi siâp ar y peth – fe fyddwn ni’n cwrdd fel tîm am y tro cynta mewn pythefnos, er mwyn gosod cynllun yn ei le. Mae rheoli 600 o wirfoddolwyr yn swydd ynddo’i hun! Mae’n fflipin sgêri, ond mae na gymaint o dalent ac ewyllys da yn y grwp, dwi’n ffyddiog y byddwn ni’n creu rhywbeth gwerth chweil.

Os hoffech chi ddysgu mwy, ewch i’n gwefan, dilynwch ni ar facebook neu twitter.

 

Patrwm: Ffabrig Cymdeithasol

Ydych chi’n teimlo fel gosod neges hardd rywle yn eich ardal chi, i ddangos bod y gymraeg yn rhan o ‘ffabrig cymdeithasol’ ein prifddinas?

Wel hwde!

Dyma batrwm syml ichi (wedi’i wneud efo stitchpoint):

Patrwm Ffabrig Cymdeithasol

 

Heb wneud pwyth croes o’r blaen ond ffansi rhoi tro arni? Mae Sarah o Craftivist Collective yn gwerthu citiau bach, sy’n cynnwys yr holl ddeunyddiau a chyfarwyddiadau – a mae’r elw o’u gwerthu yn mynd at ariannu ymgyrchoedd sy’n targedu e.e. tlodi gwaith, llafur chwys a llygredd.

Prynwch:

Llun h. Craftivist Collective
Llun h. Craftivist Collective

 

 

Arwr Gwneud #1: Olivia Quail

Dyma fodel o ‘Bryn’ a wnaethpwyd gan Olivia Quail, sy’n 82. Mae’n coffáu y cymeriad o’r ffilm Pride, a seiliwyd ar ei mab, Gethin Roberts.

'Bryn' gan Olivia Quail

Roedd o ar y stand efo ni yn Balchder Cymru rhyw gwpwl o wythnosau yn ôl, fel rhan o arddangosfa am hanes LGSM.

Manylion craff..
Manylion craff..

O’n i wrth fy modd efo’r manylion bach, yn enwedig y pwps aderyn. Am waith hyfryd, anarferol, a bach yn cripi! (y drindod crefft a gwneud)

Baneri a Ballu

Chwyldro

Ges i gic yn fy nhin gan set Gwenno yn y Dyn Gwyrdd, felly fues i’n pwytho hwn dros y penwythnos – oedd na lot o eiste yn y babell. Wnes i ddim meddwl lot am y cynllun cyn ei ddechre, felly mater o gyfri llawrydd ac ailadrodd mewn coch 666 oedd creu y faner fach.

Ar ôl cyrraedd adre, mi gariais i ‘mlaen efo’r pwyth croes – dwi heb afael mewn darn ohono ers sbel. Mae’n od fel ma pethe’n eistedd yn y drôr am gyhyd ac yn sydyn chwap! Ma nhw i gyd wedi’u gorffen. Mi wnes waith clou o sampler Llwybr Llaethog (sampler! hehe!) – mae’r un gwreiddiol yn eu meddiant nhw erbyn hyn, ond drafft anorffenedig oedd hwn, oedd un pwyth yn rhy fyr.

Baner Dull Di Drais

A fel mae’r pethe ma’n gweithio, ble mae’r dwylo’n mynd mae’r meddwl yn eu dilyn. Pan glywais i fod pennaeth cyngor Caerdydd wedi honni nad yw’r gymraeg yn rhan o ‘ffabrig cymdeithasol’ y ddinas? RHY HAWDD PHIL. Mi ddechreuais ddrafftio gwahanol syniadau yn defnyddio papur graff ac adobe shape.

Ffabrig Cymdeithasol

Mi wnai bostio patrwm cyn bo hir, ar hyn o bryd dwi’n cadw mysedd yn brysur yn creu ac yn cynllwynio…

Ffabrig Cymdeithasol

#blogydydd 7: tâl teg i weithwyr masnach

Mae gan ran-ddeiliaid M+S gyfle’r wythnos hon i wneud gwahaniaeth i fywydau eu staff, ac i arwain y gad o ran talu ‘tâl byw’ yn y sector fanwerthu. Mae 11.5% o gartrefi Cymru o dan dlodi gwaith – oherwydd tâl isel neu gontractau 0 awr, felly dyma geisio gweithredu i argyhoeddi M+S i roi tâl teg i’w gweithwyr ar hyd a lled Cymru.

Yr wythnos ddiwetha, fe fues i’n cymryd rhan mewn gweithred fechan yng Nghanol Caerdydd:

 

menywod yn pwytho yn gyhoeddus
Pwytho o flaen M+S yng Nghaerdydd, fel rhan o Craftivists Caerdydd, ac o dan arweiniad Craftivist Collective. Llun gan Polly Braden

 

Fe fuom ni’n brodio hancesi efo negeseuon i’r cyfranddalwyr – yn oes deiseb-glicio (a does dim yn bod ar hynny), mae creu gwrthrych feddylgar yn creu dipyn o argraff, a mae’r Craftivist Collective wedi bod yn anfon llythyrau brodio at ASau a ffigyrau cyhoeddus eraill ers tro. Ro’n i’n falch iawn o fod yn rhan o’r weithred, ac yn falch o gwrdd â phobl newydd, yn ogystal â phobl sydd wedi dod i weu yn dawel efo fi yn y gorffennol – yn enwedig am i fi ddysgu beth oedd eu henwau tro yma!

Cefnogwch yr ymgyrch wrth drydar, rhannu linc ein partner, ShareAction; codi ymwybyddiaeth, rhannu’r lluniau o flickr Craftivist Collective. Mae citiau ymgyrch, bathodynnau a’r llyfrau ar eu gwefan yn cefnogi gwaith Sarah, sy’n cydlynu gweithredoedd ar hyd Cymru, Lloegr a’r Alban, ac yn dod â ni at ein gilydd o bryd i’w gilydd i greu a, gobeithio, gwneud gwahaniaeth.

Dydd Rhyngwladol Menywod – blog ar Cymru Fyw

Shwmai ers sbel!

Yng nghanol trio twtio’r ty ar gyfer ei werthu, a gweu fy Hosan Gyntaf, ces amser i sgrifennu am gynrychiolaeth menywod ar gyfer BBC Cymru Fyw, ar gyfer Diwrnod Rhyngwladol Menywod 2015: Hanes yn cofio merched Cymru?

Ac achos bo fi di bod ar y trên am ORIAU, wnes i ofyn i bobl gyfrannu enwau menywod yr hoffen nhw eu gweld wedi’u coffau/dathlu yn y brifddinas. Mae pôl o gynigion pobl yn fan hyn – wnes i geisio cyflwyno rhywbeth o hanes a chymeriad y menywod o dan sylw ond dyw surverymonkey ddim yn gweithio’n arbennig o dda rhwng Gobowen a Chwmbrân!

Ta waeth, os y’ch chi moyn, fe allwch chi bleidleisio fan hyn: Merch i’r Brifddinas. Mae’n ddiddorol gweld pwy ma pawb wedi bod yn eu cynnig, a’r ymatebion falle fyddwn i ddim wedi ei ddisgwyl (ond sy’n hollol disgwyliedig, erbyn meddwl, pan ti’n trafod hanes menywod).

Pan dwi di bod yn rhoi sgyrsiau am hanes menywod yn y gorffennol, dwi di gofyn i bobl ofyn ynteu Symbol neu Berson oedden nhw’n edrych arni. Mae avatar Jemima Niclas yn llawer mwy cyfarwydd na stori ei bywyd, er enghraifft. Mae’r un peth yn wir mor bell yn ôl a chynrychiolaeth gynharaf menyw, Fenws Willlendorf, hefyd.

Mwy am hynny rywbryd eto, yn siwr. Dwi di bod yn lwcus iawn i gael ymateb more hael gan bobl heddiw – cofiwch adael sylw, neu gynnig syniad yn y pôl, neu rannu linc at eich gweithgareddau DRhM2015 chi.

A gobeithio y byddwch chi’n mwynhau gweddill y diwrnod!

Trafod Tabws ar Taro’r Post

Mi ges i ddau gais am gyfweliad gan y BBC ddoe, un yn gofyn imi drafod Winston Churchill, a’r llall yn gofyn i mi sôn am fislifau. Cewch ddarganfod pa un ddewises i fan hyn, ar y marc 50 munud: Taro’r Post.

Os fuoch chi’n gwrando, gobeithio i chi fwynhau – roedd yn gret gallu ychwanegu ‘periods’ at y rhestr amrywiol o bethe dwi wedi siarad amdanyn nhw ar y radio/teli yn ddiweddar (pêl droed pledren mochyn, hanes y lliw glas, pantomime dames, David Jones, hanes caethwasiaeth, ysbrydion, ymladd ceiliogod, trais yn erbyn menywod a sut i greu steil gwallt Tuduraidd – portffolio brith ond difyr).

Os oes diddordeb gennych chi yn y pwnc uchod, ‘y tabw olaf’ yn ôl y cyfryngau – ewch draw i wefan Period Positive i ddysgu rhagor am ymgyrchoedd dychmygus a doniol sy’n ceisio gwella safon addysg rhyw ac addysg iechyd mislif ym mhrydain.

Ewch draw i ‘Leak Chic’ i lawrlwytho ategolyn ffasiynol newydd, fel rhan o ymgyrch sy’n ceisio tynnu ar un o ofnau mwyaf sawl person ar ei mislif – y blotyn gwaed.

Os ydych chi ag awydd mentro i fyd ‘gwaedu amgen’, mae Holy Sponge yn gwerthu citiau mislif llawn sbwng môr, saets a swynau – neu os yw hynny’n ormod, efallai y bydd padiau cotwm neu cwpan fislif yn siwtio’n well.

Os, fel fi, ‘dych chi’n licio’r syniad o fod yn Fama Ddaear, ond bod clymau cywilydd dal chydig yn rhy dynn i adael i bopeth ‘hongian mas’, beth am gefnogi prosiect sy’n ceisio torri tabw go iawn: menywod sy ddim yn cael dewis o unrhyw nwyddau hylendid, oherwydd agweddau ceidwadol at fislif – rhai sy’n gorfod defnyddio carpiau neu ludw i gasglu’r gwaed oherwydd cost a phrinder nwyddau addas.

Cefnogwch y menywod ifanc sy’n credu taw salwch yw’r mislif, oherwydd diffyg addysg rhyw, sy’n ofn y mislif, ac yn cadw draw o’r ysgol un wythnos y mis oherwydd diffyg cyfleusterau saff. Mae Women on Wings yn darparu peiriannau gwneud padiau, ac addysg mislif mewn cymunedau ble mae gwir dabw yn niweidio iechyd a hyder menywod. Fel soniais i yn y cyfweliad – cysyniad yw’r tabw gafodd ei drafod yn y tabloids yr wythnos hon – felly beth am estyn y drafodaeth i’r byd go iawn, a’i ddefnyddio i wella ansawdd bywyd menywod yn wyneb y ‘tabw olaf’.

#blogydydd 12: o glasto i galais

Pan dwi’n cael gafael ar Rhiannon, mae hi newydd fod yn ymolchi mewn cawodydd cyhoeddus wedi’u hamgylchynu gan weiars pigog. Mae’n debyg mai felna mae bywyd yng Nghalais: cyfleusterau ar hyd ochrau’r hewl i yrrwyr loris a faniau sy’n tramwyo’r sianel, y rhesi o ddynion sy’n chwilio am ffordd o deithio gyda nhw, a’r ffensys sy’n eu rhannu.

‘Dyw bodolaeth gwersylloedd mudwyr ddim yn gyfrinach, ond ar ôl iddyn nhw gael eu dymchwel gan heddlu fis dwetha, mae sefyllfa pobl dlota Ewrop wedi gwaethygu yn enbyd. Mae bron pawb sy’n cyrraedd Calais wedi’u trafficio.

Mae Calais Migrant Solidarity yn cynnal protest heddiw i godi ymwybyddiaeth, a daeth ymdrech undramodydd o Gaerdydd at fy sylw, wrth iddi ddod o hyd i ffordd i roi lloches i’r mudwyr ar y ffîn.

Mae Rhiannon White wedi bod yn casglu pebyll a blancedi wedi i’r torfeydd adael Glastonbury, a’u cario i Galais i’w rhannu gyda dynion heb unrhyw eiddo o gwbl. Mae’n syfrdanol bod pabell gaiff thaflu ar ôl gweithgaredd hamdden, fel Glastonbury, yn dod yn gartref gwerthfawr wrth iddi groesi’r ffîn. Mae’n werth cofio bod y gagendor rhyngddom ni yn llawer mwy grymus na llinell ar fap neu ddarn o ddwr.

Fe ges i gyfle i siarad efo Rhiannon bore ma:

Llun: Rhiannon White
Llun: Rhiannon White

S: Fel wyt ti’n ei dallt hi, pam nad oes gan y bobl yma flancedi?

R: Heddiw yng Nghalais mae tua mil o fudwyr ar y ffîn, a ma mwy o bobl yn cyrraedd bob dydd: o Sudan, o Eritrea ac o Bacistan. Mae ‘na ddau brif wersyll yma a tua pythefnos yn ôl fe wnaeth yr heddlu ddatgan eu bod yn poeni am lefelau haint scabies ymysg mudwyr. Mi ddaethon nhw i’r gwersylloedd a rhacso’r holl bebyll a blancedi, a rhoi’r mudwyr ar fysiau i Baris, dan osgordd heddlu oedd yn cynnwys hofrennydd. Mi anfonwyd y dynion yma ymlaen i rannau eraill o Ffrainc a’r Eidal. Felly mae tipyn ohonyn nhw wedi cyrraedd ‘nôl, er mwyn trio croesi, yn syth o orsafoedd heddlu yn eiddo ar ddim byd, dim ond y dillad oedden nhw’n ei wisgo pan ga’th y gwersylloedd eu clirio.

Felly ‘dyn ni wedi dod i Galais efo 150 o bebyll wnaethon ni ffindio yn Glastonbury ar ôl yr wyl – pebyll oedd pobol wedi’u lluchio neu’u gadael drachefn. A roedd y mudwyr yn cwffio amdanyn nhw. Does na fyth ddigon, achos bo cymaint o ddynion yn cyrraedd bob dydd a chyn lleied yn llwyddo i groesi.

S: Mae ymgyrchu ar lein, yn ogystal â beirniadaeth ohono, wedi cynyddu dros y ddwy flynedd ddwetha. Beth mae’n gymryd i wneud rhwbeth yn y cigfyd, o’i gymharu â ail-drydar ymgyrchoedd neu arwyddo deiseb ar-lein?

R: Y tro cyntaf ti’n gweld anghyfiawnder. Pan ti’n ei weld e, realiti’r peth, ma raid iti wrthweithredu a cheisio ei ddisodli. A’r mwya o hynna ti’n ei wneud, y mwyaf ti ishe ei wneud. Achos mae bod yn y fan a’r lle – oedd gynno ni ddim syniad fod pethe mor wallgo yma. Mi weles grwp o ddynion o Sudan yn aros wrth y ffîn a dynion Ffrengig yn gweithio wrth eu hochor, yn edrych reit trwyddan nhw, heb eu cydnabod fel petaen nhw mewn dau fyd gwahanol. Felly gall deiseb arlein roi’r rhif i ti, bod 1000 o bobl heb loches. Ond ma realiti’r sefyllfa, unigolion yn cwffio dros flanced – pan ti’n gweld hynna mae raid iti wneud rhywbeth.

S: Pam bo mudwyr isio croesi i’r DU yn benodol?

R: Dwi wedi bod yn gofyn hyn a ma’r ymateb di bod yn amrywiol. Fe gwrddais i â boi o Sudan ddoe a’i ymateb o oedd bod triniaeth y DU o fudwyr yn fwy teg. Ond dyw hynny ddim yn berthnasol i bawb – er enghraifft, mae mudwyr sy’n dianc y rhyfel yn Syria yn fwy tebygol o gyrchu lloches yn Sweden, oherwydd bod cytundeb gan y wlad i ganiatáu hynny. Felly mae’n amrywio.

T [cyd-deithiwr yn y fan]: Mae’n werth cofio bod llawer o’r gwledydd ‘ma’n gyn-drefedigaethau, er enghraifft yn Sudan, maen nhw’n eich dysgu yn yr ysgol fod digon i bawb yn y DU.

S: O be dwi’n ddeall mae’r rhan yna o’r siwrne, o gyfandir Ewrop i’r DU, yn un bwysig iawn i lawer o fudwyr. O’n i’n ceisio dirnad faint o’r siwrne yna sy’n symbolig.

R: Mae o yn symbolig. Mae’r Ffrainc a’r Almaen yn trin mudwyr mewn ffordd weddol debyg, ond yn y DU maen nhw’n cael eu trin chydig yn well. Pan maen nhw’n cyrraedd y DU, maen nhw wedi ennill.

Llun: Rhiannon White
Llun: Rhiannon White